लालबागच्या राजाला २० किलो सोन्याचा मुकुट अर्पण,अंबानी परिवाराने दिली भेट

मुंबईतील जगप्रसिद्ध लालबागचा राजा गणपतीच्या दर्शनासाठी दरवर्षी लाखो भक्तगण गर्दी करतात. यंदाच्या गणेशोत्सवात, लालबागचा राजा विशेष आकर्षण ठरत आहे, कारण त्याला तब्बल २० किलो सोन्याचा मुकुट अर्पण करण्यात आला आहे.देशातील प्रतिष्ठित उद्योगपती अनंत अंबानी यांनी हा बहुमूल्य मुकुट भेट दिला आहे. रिलायन्स फाऊंडेशनतर्फे दिलेल्या या मुकुटाची किंमत तब्बल १५ कोटी रुपयांपर्यंत असल्याचे समजते.

गुरुवारी लालबागच्या राजाच्या पहिल्या दर्शनाचा सोहळा पार पडला, आणि त्याचवेळी या मुकुटाची झलक सर्वांना पहायला मिळाली. यंदाच्या गणपतीची मूर्ती नेहमीप्रमाणेच भव्य आणि मनमोहक आहे. राजा मयूरासनावर विराजमान असून त्याच्यावर सोन्याचा मुकुट शोभून दिसत आहे.

अंबानी कुटुंबीयांनी दरवर्षीप्रमाणे यंदाही गणपती बाप्पाला भेट दिली आहे. परंतु यावेळी अनंत अंबानी आणि राधिका मर्चंट यांच्या लग्नानंतरचा हा पहिला गणेशोत्सव असल्याने, अंबानी कुटुंबीयांनी मोठ्या भक्तिभावाने २० किलोचा हा सोन्याचा मुकुट अर्पण केला आहे.

लालबागचा राजा मित्र मंडळाने यावर्षी काशी विश्वनाथ मंदिराची थीम घेतली आहे, आणि गणपती बाप्पाला लाल रंगाच्या वेल्वेटचं सुंदर सोवळं नेसवण्यात आलं आहे. मंडळाचे मानद सचिव सुधीर साळवी यांनी दिलेल्या माहितीनुसार, या मुकुटाची निर्मिती दोन महिन्यांत झाली असून, कुशल कारागीरांनी यावर अथक मेहनत घेतली आहे.

गणेश मंडळाला ९१ वर्ष पूर्ण -

लालबागच्या राजाची ही ९१ वी वर्षपूर्ती आहे, आणि यंदा मुंबईतल्या गणेशभक्तांसाठी विशेष उत्सवाचे आयोजन करण्यात आले आहे. अनेक सेलिब्रिटी, राजकीय व्यक्तिमत्त्वे, उद्योगपती, आणि देश-विदेशातील महत्त्वाचे पाहुणे या गणेशोत्सवाच्या साक्षीदार होणार आहेत.

अनंत अंबानी यांना मंडळाचे सदस्यपद -

दरवर्षीप्रमाणे यावर्षीही अनंत अंबानी लालबागच्या राजाच्या कार्यकारी मंडळात मानद सदस्य म्हणून निवडले गेले आहेत. अंबानी कुटुंबीयांचे धार्मिक आणि सांस्कृतिक क्षेत्रातील योगदान महत्त्वाचे मानले जाते, आणि याचा सन्मान म्हणून ही नियुक्ती करण्यात आली आहे. 

लालबागचा राजा नवसाला पावणारा मानला जातो, आणि म्हणूनच बाप्पाच्या दर्शनासाठी सर्वसामान्यांपासून ते व्हीव्हीआयपींपर्यंत अनेक जण लालबागच्या परिसरात गर्दी करतात. यंदाच्या वर्षीचा हा सोन्याचा मुकुट देखील भक्तांसाठी एक विशेष आकर्षण ठरत आहे.

लालबागच्या राजाच्या पहिल्या दर्शनाचे व्हिडीओ सध्या सोशल मीडियावर व्हायरल होत आहेत, आणि गणपती बाप्पाच्या आगमनाची उत्सुकता आणखी वाढली आहे.