अजित पवारांनी जाहीर केलेला पहिला उमेदवार फुटला,हाती घेणार तुतारी,फलटणच्या राजकारणात मोठी उलथापालथ

फलटण तालुक्यातील राजकीय घडामोडींनी जिल्ह्यासह राज्यभरात लक्ष वेधलं आहे. विधान परिषदेचे माजी सभापती आणि राष्ट्रवादी काँग्रेसचे ज्येष्ठ नेते रामराजे नाईक निंबाळकर यांचा गट सध्या चर्चेत आहे. रामराजेंनी तुतारी हाती घेण्याच्या चर्चांना अखेर पूर्णविराम दिला आहे, मात्र त्यांच्या बंधू श्रीमंत संजीवराजे नाईक निंबाळकर आणि फलटण-कोरेगाव विधानसभा मतदारसंघाचे विद्यमान आमदार दीपक चव्हाण हे शरद पवार गटात जाण्याचा निर्णय घेतल्याने फलटणमधील राजकारणात मोठी खळबळ उडाली आहे.

राजकीय तणावाची वाढती कसोटी

अजित पवार गटात असलेले संजीवराजे आणि दीपक चव्हाण यांनी राष्ट्रवादीच्या शरद पवार गटात प्रवेश करणार असल्याचे जाहीर केले आहे. १४ ऑक्टोबर रोजी शरद पवार यांच्या उपस्थितीत हा प्रवेश होणार असून, फलटणमधील तुतारी सोबत घेण्याचा एकमुखी निर्णय झाला आहे. या निर्णयामुळे भाजप आणि महायुतीतील अन्य नेत्यांचे धाबे दणाणले असून, कोरेगाव, माण, आणि वाई या मतदारसंघातील राजकीय समीकरणं बदलण्याची शक्यता आहे. तिन्ही विद्यमान आमदारांच्या जागा धोक्यात येऊ शकतात.

रामराजे तटस्थ, महायुतीसोबत मात्र प्रचाराला नाही

रामराजे नाईक निंबाळकर यांनी मात्र अजित पवार यांच्या गटात राहण्याचा निर्णय घेतला आहे. त्यांनी महायुतीच्या प्रचाराला मात्र अलिप्त राहण्याचा निर्णय घेतला आहे. फलटण आणि कोरेगाव मतदारसंघातील विकासकामांमध्ये अजित पवार यांनी दिलेले योगदान पाहता, रामराजे अजित पवार यांची साथ सोडणार नाहीत. तरीदेखील त्यांनी त्यांच्या कार्यकर्त्यांना शरद पवार गटात जाण्यास मान्यता दिली आहे, ज्यामुळे त्यांच्या तटस्थ भूमिकेवर अनेकांच्या भुवया उंचावल्या आहेत.

गटबाजीमुळे स्थानिक राजकारणात ताणतणाव

रामराजे नाईक निंबाळकर आणि माजी खासदार रणजीतसिंह नाईक निंबाळकर यांच्यातील वादाच्या पार्श्वभूमीवर हे सगळं घडत आहे. रामराजेंनी रणजीतसिंह यांच्यावर टीका करताना म्हटलं की, "रणजीतसिंह यांना टीका करण्याची सवय आहे. त्यांनी माझ्या पत्नीबद्दल बोलून अती केलं आहे. मी तोंड उघडलं तर १६ नावं सांगेन." रणजीतसिंह यांनी रामराजेंना "मुंज्या" असं संबोधून टीका केली होती, ज्यामुळे या वादात अजून पेट निर्माण झाला आहे.

फलटणचं राजकारण राज्याच्या केंद्रस्थानी

14 ऑक्टोबरला शरद पवार यांच्या उपस्थितीत होणाऱ्या या राजकीय मेळाव्याने फलटण तालुक्याचे राजकारण राज्याच्या चर्चेत आणले आहे. कार्यकर्त्यांमध्ये असलेली नाराजी, महायुतीतील अडवणूक, आणि भाजपच्या स्थानिक नेत्यांसोबतचे मतभेद यामुळे या घडामोडींना वेगळं वळण मिळालं आहे. रामराजे नाईक निंबाळकर यांच्या तटस्थ भूमिकेमुळे राज्यभरात या निर्णयाची चर्चा होत आहे.फलटणच्या राजकीय घडामोडींचं पुढील काळात काय परिणाम होतील याकडे सगळ्यांचं लक्ष लागलं आहे.