भारतीय शेअर बाजारात मोठी उसळी,अमेरिकन फेडरल रिझर्व्हच्या व्याजदर कपातीचा परिणाम, सेन्सेक्स ६०० अंकांनी वधारला

गुरुवारी भारतीय शेअर बाजारात जोरदार तेजी पाहायला मिळाली, ज्याचे श्रेय अमेरिकन फेडरल रिझर्व्हच्या व्याजदर कपातीला जाते. चार वर्षांनंतर अमेरिकेच्या केंद्रीय बँकेने 0.50% म्हणजेच 50 बेसिस पॉइंट्सने व्याजदरात कपात केली, ज्याचा तात्काळ परिणाम जागतिक शेअर बाजारांवर दिसला. अमेरिकेतील या निर्णयामुळे जपानच्या निक्केई, दक्षिण कोरियाच्या कोस्पीसारख्या आशियाई बाजारात तेजी आली, आणि त्याच प्रभावामुळे भारतीय शेअर बाजार देखील विक्रमी उच्चांकावर पोहोचला.

Image Source : www.freepik.com

आज सकाळी बीएसई सेन्सेक्स 600 अंकांनी उसळून 83,563 अंकांवर पोहोचला, तर एनएसई निफ्टी 173 अंकांची वाढ दाखवत 25,551 अंकांवर व्यवहार करत होता. विशेष म्हणजे, सेन्सेक्समधील सर्व 30 समभाग हिरव्या चिन्हात व्यवहार करत होते, ज्यामुळे बाजारात सकारात्मक वातावरण होते.

गुंतवणूकदारांचे कोट्यवधींचे उत्पन्न

या घडामोडींमुळे गुंतवणूकदारांचे संपत्ती 3.3 लाख कोटी रुपयांनी वाढले आहे. फेडरल रिझर्व्हच्या निर्णयामुळे मार्केट कॅप BSE वर 4.70 लाख कोटी रुपयांवर पोहोचले. गुंतवणूकदारांच्या संपत्तीत एका दिवसात तब्बल 3.09 लाख कोटींची वाढ झाली आहे.

कोणत्या क्षेत्रात होती तेजी?

आजच्या तेजीमध्ये बँकिंग आणि आयटी क्षेत्रातील समभागांनी मोठे योगदान दिले. HDFC बँक, इन्फोसिस यांसारख्या कंपन्यांचे समभाग वधारले. बँक आणि आयटी क्षेत्रातील समभागांनी सेन्सेक्स आणि निफ्टीच्या वाढीला मोठा हातभार लावला. याशिवाय, NTPC, एलटीआय माइंडट्री आणि विप्रो यासारख्या कंपन्यांचे समभागही 2% पेक्षा जास्त वधारले.

फेडरल रिझर्व्हच्या व्याजदर कपातीचा भारतावर परिणाम

अमेरिकन फेडच्या या निर्णयाचा भारतातील व्याजदरांवर देखील परिणाम होण्याची शक्यता आहे. तज्ज्ञांच्या मते, पुढील काळात भारतीय रिझर्व्ह बँकेकडून व्याजदरात कपात होऊ शकते. मार्च 2025 पूर्वी भारतात 25 बेसिस पॉइंट्सची घट होण्याची शक्यता वर्तवली जात आहे. फेडच्या कपातीमुळे भारतासारख्या उदयोन्मुख बाजारांमध्ये अधिक गुंतवणूक होईल, ज्याचा परिणाम शेअर बाजारात दीर्घकालीन तेजीच्या रूपाने दिसू शकतो.

जागतिक अर्थव्यवस्थेवर परिणाम

अमेरिकेतील महागाईचा दर कमी झाल्यामुळे फेडने ही व्याजदर कपात केली आहे. यामुळे जागतिक बाजारात एक नवा विश्वास निर्माण झाला आहे. तथापि, अमेरिकेतील अर्थव्यवस्थेच्या मंदीचा धोका अद्यापही कायम आहे, आणि जर अमेरिकेतील मंदी वाढली, तर त्याचा परिणाम भारतासह इतर देशांवरही होण्याची शक्यता आहे. 

सध्याच्या घडामोडींमुळे भारतीय रुपयाची किंमत वाढणार असून, विदेशी चलनसाठा देखील वाढू शकतो. अमेरिकन डॉलरची कमजोरी भारतासाठी फायदेशीर ठरणार आहे. मात्र, हे फायदे किती टिकतील, हे पुढील आर्थिक घडामोडींवर अवलंबून आहे.