बदलापूर रेल्वे स्थानकावर गोळीबार,दोन जण जखमी तर प्रवाशांमध्ये भीतीचे वातावरण

बदलापूर शहरातील रेल्वे स्थानकावर गुरुवारी संध्याकाळी सहा वाजता झालेल्या गोळीबाराच्या घटनेने शहर पुन्हा एकदा हादरले आहे. होम प्लॅटफॉर्मवर हा थरकाप उडवणारा प्रसंग घडला, ज्यामुळे प्रवाशांमध्ये भीतीचं वातावरण निर्माण झालं आहे.

नेमकं काय घडलं ?

मिळालेल्या प्राथमिक माहितीनुसार, बाजारपेठेतील वादानंतर बदलापूर रेल्वे स्थानकात चौंघांमध्ये पुन्हा वाद झाला. या वादाचे रूपांतर गंभीर स्वरूपात झाले आणि अचानक विकास नाना पगारे या 25 वर्षीय इसमाने आपली बंदूक काढून दोन व्यक्तींवर तीन राऊंड फायर केले. यामध्ये एका व्यक्तीच्या पायाला गोळी लागली, पण सुदैवाने त्याचे प्राण वाचले. गोळीबारानंतर जखमी व्यक्ती आपल्या सहकाऱ्यासह घटनास्थळावरून पळून गेला.

पोलिसांची जलद कारवाई

घटनेची माहिती मिळताच रेल्वे पोलिसांनी तत्काळ हस्तक्षेप केला आणि आरोपी विकास नाना पगारे याला ताब्यात घेतले. पगारेकडून दोन पिस्तूल आणि काही शस्त्रे जप्त करण्यात आली आहेत. सध्या रेल्वे आणि सिटी पोलिसांनी त्याचा जबाब नोंदवला असून, घटनेचा सखोल तपास सुरू आहे. तसेच, या घटनेतील इतर दोन आरोपींना पकडण्याचे प्रयत्न पोलिसांकडून सुरू आहेत.

प्रवाशांमध्ये घबराट

घटनास्थळावर असलेल्या प्रवाशांमध्ये या गोळीबारानंतर मोठी घबराट पसरली. लोकांची पळापळ सुरू झाली आणि स्थानकावर काही काळ प्रचंड गोंधळ निर्माण झाला. व्हिडिओ क्लिप्स सोशल मीडियावर व्हायरल झाल्या, ज्यामध्ये पळत जाणाऱ्या लोकांची भीती स्पष्ट दिसत आहे. पोलिसांनी तत्काळ स्थानकातील सुरक्षेची व्यवस्था कडक केली आणि परिस्थिती नियंत्रणात आणली.

बदलापूरमध्ये गुन्हेगारी वाढ?

या घटनेनंतर बदलापूरमध्ये गुन्हेगारीच्या घटनांमध्ये वाढ झाल्याची चिंता नागरिकांमध्ये वाढली आहे. काही महिन्यांपूर्वीच शहरातील एका नामांकित शाळेत घडलेल्या अत्याचाराच्या घटनेनंतर मोठे आंदोलन झाले होते, ज्यामुळे रेल्वे स्थानकावर आंदोलकांनी तोडफोड केली होती. आता या गोळीबाराच्या घटनेनंतर शहरात पुन्हा एकदा अस्वस्थता निर्माण झाली आहे.

पुढे काय?

गोळीबाराच्या घटनेनंतर पोलिसांकडून तपास वेगाने सुरू आहे. आरोपीला अटक करण्यात आल्याने तपासात महत्त्वपूर्ण माहिती समोर येण्याची शक्यता आहे. तसेच, या प्रकरणात पोलिसांनी कडक कारवाई करणार का, याकडे शहरवासीयांचे लक्ष लागले आहे.

रेल्वे स्थानकासारख्या सार्वजनिक ठिकाणी अशा हिंसक घटना घडणं अत्यंत गंभीर आहे. त्यामुळे शहरातील सुरक्षाव्यवस्था आणखी मजबूत करण्याची मागणी नागरिकांकडून होत आहे.बदलापूर शहर व परिसरात गुन्हेगारीचे प्रमाण वाढते आहे.अल्पवयीन मुलीवर झालेले अत्याचार प्रकरण ताजे असताना आता हे नवीन प्रकरण समोर आले आहे,यामुळे शहर व परिसरात कायदा व सुव्यवस्थेचा प्रश्न निर्माण झाला आहे.पोलीस यंत्रणेचा धाक गुन्हेगारांना राहिला नसून सामान्य नागरिकांमध्ये भीतीचे वातावरण आहे.